奉勸香港青年 莫再充當他人製造禍端的棋子

時事
作者:家庆良
2019-07-12

青年人個個都心懷熱血,富有衝勁,但呢啲特點亦都令佢哋容易畀有心之人利用,喺煽動同誘惑之下成為他人製造禍端嘅棋子。喺連日嚟嘅「反送中」遊行中,就有大批香港青年被熱血沖昏頭腦,成為極端示威者嘅一份子,大搞破壞之事。呢啲青年人以為自己為香港奉獻力量,以為自己為香港而戰,以為自己英勇不屈,但實際上祇不過係為他人作嫁衣。

自事件爆發以嚟,便不斷有反對派人士公開支持示威者嘅無理暴行,故意忽略示威者主動攻擊警員、衝擊政府大樓、破壞公眾設施呢啲違法亂紀嘅事實,一味咁指責特區政府同香港警隊嘅不是,如何韻詩、黎智英等人就係當中之典型。呢啲反對派人士往往唔會親自落場參與到示威衝突之中,為咗達到佢哋不可告人嘅政治目的,佢哋喺背後無所不用其極咁美化、洗白「反送中」遊行,將青年人當正佢哋搞亂香港社會秩序、踐踏香港法治嘅炮灰,完全唔考慮咁會對青年人嘅未來造成幾大幾嚴重嘅影響。

除此之外,仲有反對派人士潛入到示威隊伍中,煽動、號召更多青年人加入示威隊伍中,教唆、鼓動青年示威者衝喺暴力衝突嘅前線,大行打砸破壞之舉。如「港獨」梁繼平就現身喺7月1號衝擊立法會嘅現場,佢當晚曾於示威隊伍中「慷慨陳詞」,煽動示威者佔領立法會,大聲喊「我哋冇得返轉頭」、「我哋冇得玩快閃嘅喇」,仲除低口罩,似乎話畀所有人聼佢自斷後路,獻身衝鋒嘅熱血之情。如此「慷慨激昂、熱血澎湃」嘅場景,難免會有熱血青年畀梁繼平感染,誓死跟隨其左右。但近日有消息爆出:梁繼平實際上喺7月1號當日經已book好咗離港機票,喺煽動一批青年人對立法會打砸搶奪之後,呢條友竟然第二日朝早就離開香港前往國外,留低立法會呢壇蘇州屎同埋一班傻更更嘅「熱血」青年你眼望我眼。

青年人富有熱血和衝勁嘅同時,都應該富有智慧和理性,避免自己成為他人利用嘅「棋子」。「反送中」遊行至今經已暴露出好多問題,唔單止對全港市民嘅工作同生活造成嚴重嘅影響同干擾,亦都嚴重踐踏咗香港嘅法治。每一個人都應該為自己嘅行為負責,唔好喺鑄成大錯之後先嚟後悔,到期時冲動嘅苦果幾難啃都要自己夾硬啃。

搜尋文章